Biden Cozah Pi Hmanh Nih A Thluk Khawh Lomi Trump =================================

2016 ah president a tlin tikah Democrats nih an celh lo. Zeidek pakhatkhat a um ko lai tiah media lianlian hna hmang in si seh ramchung law enforecments lianlian FBI le CIA upa zeimawzat pawl hna bawm in kum pi kum li chung an dawi.

Robert Mueller nih $34 million dih in kum thum leng hlathlainak a tuahmi result ah Trump sualnak pakhat hmanh a um lo. An i hngahhlaang tukmi report ah Trump sualnak a um lo tikah Democrats pawl cu an lungrawk tuk. Cozah tangka a dihmi hi 25.2 million a dih. Trump a luat kho.

An kal tak cang lai tiah kan zoh cio ko lio hna ah Biden cozah pi nih State level in a siah Federal level a siah an dawi than. New York cases pahnih in Georgia case in Mar-a-Lago documents case in tazaa an cuai hrawng hna kha cu Trump hi a sungh lawng si loin a hrawh in an hrawh dih cikcek lai tiah ahopoah nih kan ruah dih. 

Taza an cawimi case vialte fonh in thong a tlak dingmi hi kum 600 leng a si. An tuahto ning a fak taktak khi a si. 

Campangin a tuah lioah meithal in zun ruk leng in an kah; pakhat nih kah a timh lioah an tlaih manh than. Democrats dah ti lo, Trump an tuahto ning kong a thei i a thinhun pi lomi; a lungfah pi lomi le a dirpi lomi aho hmanh an um lo. Cucaah a tawinak cun, 2024 i theinak a hmuhning hna cu popuplar vote zong in a siah electoral vote zong in a siah a mak kho tuk. Swing States 7 ning in a hui dih. 

Atu lio democrats ka hmuhning hna le an lungput khi cu tih an nung, an thurhnawm, bochan awktlak an si loning a lang chin lengmang. American mipi he zeizat tiang dah an i hlat lai timi lawng cuanh ding a tang cang. Mipi sin in zumh tlak sinak (trust) an hmuh than lo ahcun an dih cang. Atu an kalning khin cun an fawi ti lo. 

Khathlei in Republican upa an fitning a langh chin lengmang lioah democrats upa uar an um loning a lang chin lengmang. Minung hi common sense or kan chia-tha thleidan khawhnak nih a kan hruai lo ahcun sau pi hi mithmai ngeih khawh a rak si hrimhrim lo. 

Hihi President Trump tlaihtleng tha taktak a si tikah mipi nih an uar kho tuk. Khatlei in Biden cozah (Justice Department) pi nih Trump a dohmi hrimhrim nih mipi uarternak a santer chinchin rih. Kum li chung a tuannak ah a thurhnawm bik president lawng si loin san a tlai lo bik president ah a cang. 

Trump cu president a tuan than cang lawng si loin atu tiang a tuanmi zoh tikah president term hi ri ngei hlah seh law a nunchung tuan ding in mipi nih an duh cang lai. 

A tawinak in a ruang tlawmpal te ka langhter lai. 

1) Campagin ah a chim pengmi DOGE (Department of Government Efficiency) ka ser lai. Elon Musk nih a hruai lai a ti i, kan cozah pi tangka hmannak audit kan tuah lai a ti. Atu hi USAID an hlat cuahmah lio a si i, an tangka hman a lang chin lengmang. Zeitluk in dah thurhnawmhnak a um timi an theih chin lengmang tikah mipi ing a puang chin lengmang cang. 

Ram leng bawmhnak an pekmi ah Hamas condom cawknak caah $50 million aa tel (Trump bia); Nepal ah atheist zumhnak a karhnak caah $100 million aa tel (Speaker Johnson bia); nu le pa sex thlennak (press secretary nu) ... etc. USAID ah thurhnawmhnak a um timi a lang chin lengmang. Rev. Franklin Graham bia in cun, 'Pathian an ralchanhnak hriamnam pi ah a cang.' 

Democrats pawl cu Elon Musk cungah an thinhung kho tuk cang.  

2) A ralkap vanlawng in Colombian minung a kuat than hna. Kap hnih karlak ah alnak a um. Ka ram chungah na rak kuatmi ngunkhuai 25% kan lak lai an i ti; Trump nih a hnu bikah cun ka ramchung ah na rammi offical visa ka phih dih lai.. etc a ti hnu ceo ah Colombian president nih a lung thumh than. 

3) Ram kip ah phungning lo mipem a kuat thluahmah hna. Campangin ah a chim bantukin a tuah thluahmah lio a si. US ah phungning lo mipem lawng um loin Mexican cartel (mi sual taktak) pawl nih hngakchia an tlaih hna; an zuar hna; sex caah nu an zuar hna; drug tihnung cat loin an luh pi; cu nih cun ni fatin in American minung a thongthong in a thah hna. 

American mipi an that bik tu hi fentanyl an timi drug hi a si. Mexico ram in an luh pi i, Canada ramri in an luh; an hram pi cu Taluk in a si. Cu ruangah Taluk zong 25% ngunkhuai pinah a thar in 10% a chap than hna. 

Cucaah Trump nih fak piin doh a timh caah Mexican Cartel pawl cu terrorist organization tiah minthutnak a tuah cang. Doh an timh cang. American mipi himnak hi ka hmuitinh sang bik pakhat a si tiah Trump nih cun a ti pengmi a si. 

4) US lawng in doh a duh lo caah Canada le Mexico cu ngunkhuai 25% veve lak ding in a vun tlerhkhawn colh hna. US pi cu dirhonh awk a that lo caah ramri ah ralkap 10,000 ka chia lai tiah Mexico nih a ti colh; Canada zong nih ramri ralkap 10,000 ka chiah lai; helicopter he ralkap he ramri ka ven ko lai. Cun misual dohtu team zong kan dirh ti lai a ti. 

Ramri himter a duhnak saduhthah a tling khen ah a tla. Thla khat chung caan a pek veve hna. Hi chungah fek deuh le tling deuh in an ram thum in hnatlaknak an tuah lai. 

5) Ramdang hruaitu nih an tlawn hlan ah Israel PM Netanyahu aa tlawnter hmasa cem. Zeitluk in dah Israel a dirkamhnak a feh timi a langhter colh. Israel nih a ruah lo leng tiang in "US nih Gaza kan lak lai" a ti. "Jordan le Egypt tbk ah Gazan kan chiah hna lai i Gaza cu US nih sipuaizi tuahnak ah kan ser lai" a ti diam. Thlingza lei khi a si. 

Palestinian ca a siah Hamasa tapung ca a siah tihnung bia taktak a si. "An miphun ning in hloh a timh hna" an ti. Asinain Trump caah cun "nan ziaza nan thinh lo ahcun nan ram lak hi a fawi tuk hih" tbk a si. 

6) Nunnak tampi thap le tangka billion tampi dih in kum hra chung rau in US nih Panama canal (tilam) a rak sermi cu Taluk nih a luh hnawh i control a timh. US le Panama hnatlak buar in US tilawng tiang in fee tampi a lak. Trump nih "Taluk hi na thawl hna lo ahcun thil pipa taktak a chuak lai" tiah a hrocer. Secretary of State Marco Rubia a thlah colh. Taluk he contract kan tuahmi term a dih cun kan donghter cang ko hna lai tiah an rak ti than. 

7) Ram chung himnak ah bochan taktakmi FBI chungin minung zeimawzat zong a phuah thluahmah cang hna. A hleiin Jan 6 buainak a hlathlaitu paoh cu an i tel pah dih lai. Trump nih cun "mi hrokhrol" tiah a auh hna. FBI hi ramchung himnak caah keng thlung bantuk an si nain Obama le Biden cozah ah an thangchia tuk i, mipi nih an bochannak hna a zor taktak.

Khrihfa zumhnak ruangah tar nu le tar zong thong an thlak hna; hriamnam he Khrihfa inn chungkhar an luh hnawh hna; Trump a inn tiang an luh hnawh i, "ka underwear chiahnak bizu tiang an hlai dih" tiah Melania Trump cu aa fahsak thai. Trump nih FBI director caah Kash Patel a thimmi an confirm cuahmah lio a si. Trump nih cun 'rampi agency department hna hi party dangdang dohnak hriamnam ah kan hman hna awk hrimhrim a si lo' a ti. 

Biden nih cun FBI he Cozah kengtlung bantuk a simi Justice Department he an hman hna i Trump dohnak a hman dih hna. Trump nih JD hruaitu a thimmi nu nih zeimaw tal cun lehrul a tuah men te lai tiah ka zumh. "State level in a siah federal level in a siah Trump taza an cuahnak vialte kan zoh than dih lai" a ti. 

8) A sau cang, Trump nih 'nu sport ah pa (nu dawk or pa-dawk)an i tel kho ti lo' tiah min a thut cang. Khrihfa zumhnak ka runven lai tiah min a thut rih. 

9) No tax on overtime; no tax on tips; 2017 ah a rak tuahmi a pezulh than dingmi cu tax cut a tuahmi a tuah than lai. 

A cungah ka langhtermi tlawmpal te hmanh nih hin zeitluk in dah mipi a lawmhter hna mu ...